السلام عليكم حبيباتي
شلونكم لاشان لونكم
اليوم وانا افرفر بالمنتديات لقيت قصيده الصراحه قريتها وفليتها ضحك .؟
هي الصراحه لواحد شراري .. شايب اول مره يركب طياره .. وصاغ شعوره بكم بيت .. هههههه
ودعت ناجح من مطار القريات
يوم اركبونا الطائرة واشلعتنا
لفت ودارت وامرجت بين لحظات
لولا المحازم الكراسي ضربتنا
طاروا بنا حمر العلابي خواجات
صغر العيون وجيههم هولتنا
تكفى تشهد يافهد واقرا آيات
الموت جانا والظروف اجبرتنا
جانا المضيف وقال وش فيه خدمات
قلت نزلونا بطونا موجعتنا
من قبل أشوف الغيم من دون السموات
واليوم أشوفه يافهد من تحتنا
عزالله إني ماحسبت الحسابات
والا ترى سيارتي موصلتنا
يازين ممشى الأرض لو هي مسافات
لنا بشعيب مجهزين قهوتنا
وش جابني للطائرة والمطارات
والله ماعود ركوبها لو نزلتنا
لو تنفجر قامت تذيع المحطات
رح عاد دور قشنا مع جثثنا
سمع هالقصيده واحد عنزي وقام رد عليه بكم بيت
يامودع ناجح بمطار القريات
قصتك لو تضحك ترا حيرتنا
ياليت ماقالو ترانا شرارات
ليت الخوي قال لخويه سكتنا
هذي قبيله تنعرف بالشجاعات
كلن تقول من القبايل غزتنا
بالطايرة لو مت من عرض من مات
ولاقلت ان الطايرة خوفتنا
بالطايرة خايف وبالقلب دقات
قلت العيون اللي تبينا بكتنا
لاتفتخر بالخوف وتسجل ابيات
ولو انت ماسجلتها ماشمتنا
الناس يابن الناس ترقا درجات
هذي تجارب وقتنا علمتنا
شف الشجاع اللي رقا بالطويلات
فوق القمر يحمل علم مملكتنا
سلطان ابن سلمان زبن الونيات
اللي فعوله بالدول شرفتنا
هذا كلام الوايلي بالاشارات
يوم الشمالي قصته زعلتنا
والختم صلو بسم رب السموات
على الرسول المصطفى خاتمتنا
وصل الرد لشاعرنا الشراري وحب يرد عليه بكم بيت
هذا حديد مايعرف الشجاعات
ولاهو آدمي وتخوفه مرجلتنا
عنتر بلش بالثور صابه مخافات
.... ....من بلشته وثمتنا
يالوايلي لاتشك مابنا مشكات
الاوادم كلها عارفتنا
حنا نحب الضحك بالشعر وابيات
لو قلت خوف الناس ماصدقتنا
كل ماسمعته بالقصيده دعايات
لايصيبك شك الطايره خوفتنا
المرجله ماهنا عليها شهادات
ان ماشريناها تراها شرتنا
لو ندعي بالخوف مزح وخرافات
والحرب خطه للجيوش اجهلتنا
اليا انسحب يرجع بقوه وهجمات
لين العدو ينحاش من منطقتنا
وان كان سلطان ارتفع للمجرات
قبله امريكا وروسيا سابقتنا
خل المحاور بيني وبينك بالذات
لاادخل الامار في سالفتنا
وســـــلا متكمـ وخيتكم (هودا )
الأحد سبتمبر 07, 2008 6:55 pm
